Mu gihe imirwano ikaze ikomeje hagati ya AFC/M23 n’ingabo za leta ya RDC (FARDC) hamwe n’abafatanya nazo, imwe mu ntwaro iri gukoreshwa n’uruhande rwa leta ni indege zitagira abadereva (drone) zizwi nka “Baba Yaga”.
Uruhande rwa AFC/M23 ntirusiba kuvuga ko ingabo za leta zikoresha drone mu “kurasa buhumyi” ku basivile bo mu duce dutandukanye two mu Ntara ya Kivu y’Amajyaruguru n’iy’Amajyepfo.
Mu ijoro ryo ku wa Gatandatu rishyira ku Cyumweru gishize, muri santeri ya Rubaya mu Teritwari ya Masisi no muri Rutshuru hagabwe ibitero byakozwe na drones, nk’uko AFC/M23 ibivuga.
Ku Cyumweru nabwo mu masaha y’umugoroba ni bwo drone yarashe ku kibuga cy’indege cya Kisangani, gikoreshwa na Leta ya Congo mu kugaba ibitero kuri AFC/M23.
Amakuru avuga ko icyo gitero cyari kigambiriye gusenya ibiro bikoreshwa mu kugaba ibitero bya drones z’ubwoko butandukanye by’umwihariko kurimbura izizwi nka “Baba Yaga” zaguzwe muri Ukraine.
Icyo gitero cyemejwe na Guverineri w’Intara ya Tshopo, Paulin Lendongolia Lebabonga, wavuze ko ikibuga cy’indege cya Kisangani cyarashweho bombe icyenda “n’umwanzi”.
Amakuru agera kuri MARIS POST avuga ko cyaguyemo Majoro (Rtd) w’Umubiligi wari ushinzwe guhagurutsa drones na Adjudant-Chef na we w’Umubiligi bakoranaga.
Iki gitero kandi cyasenye intwaro zo kurinda ikirere zirimo ZU-23-2 na ZSU-23-4 Shilka (ifite radar), zari ziri kuri icyo kibuga.
Abahanga mu bya gisirikare bavuga ko Leta ya Kinshasa ikomeje gushora agatubutse mu bihugu bitandukanye, harimo Turkey yaguzemo Bayraktar TB2, mu Bushinwa CH-4, no muri Ukraine yaguze drones za Baba Yaga.
Baba Yaga ni drones bwoko ki?
Baba Yaga ni izina rikoreshwa kuri drones nini zo mu bwoko bwa ‘hexacopter’ cyangwa ‘octocopter’, zifite moteri esheshatu cyangwa umunani, zamamaye cyane mu ntamabara ya Ukraine n’u Burusiya.
Izi drones zikunze kuba nini kurusha izisanzwe zifata amashusho, kandi munsi yazo hashyirwaho ibisasu, mine cyangwa grenade zikoreshwa mu bikorwa bya gisirikare.
Amakuru avuga ko izo drones zamamaye kubera ubushobozi bwazo bwo gukora nijoro, gutwara ibisasu biremereye no gutera ubwoba abasirikare bari ku rugamba bitewe n’urusaku n’imiterere yazo.
Izi drones zigurutswa n’abakozi babiri babihugukiye bari kuri ‘control station’, baba bahabwa amashusho n’amakuru y’ibyo zireba biva ku cyogajuru.
Zigira camera zisanzwe, camera zifata amashusho nijoro (infrared cyangwa thermal camera), GPS ndetse na sisitemu zo kohereza amashusho mu gihe nyacyo.
Mu buryo rusange, izi drones zimara mu kirere hagati y’iminota 30 n’amasaha 2; ariko iyo zitwaye imizigo iremereye zigera ku minota 20–60, mu gihe zitaremerewe mu butasi zishobora kugera ku masaha 2.
Zimwe muri drones za ‘Baba Yaga’ zishobora kugera ku muvuduko wa km 80 mu isaha, zigafata igipimo ku ntera ya hafi km 20 ziri mu kirere.
Zifite ubushobozi bwo kugaba ibitero ku birindiro by’igisirikare, gusenya indaki n’imodoka z’intambara, gutega mine, gutanga amakuru y’aho umwanzi aherereye ndetse no gukora ibindi bikorwa ku rugamba.
Nk’uko Forbes ibivuga, “Baba Yaga” itwara ibisasu biyobowe hifashishijwe “semi-active laser guidance”, biyifasha kugera ku ntego neza mu buryo bugoranye kuyihusha.
Izi drones zifatwa nk’iz’urupfu, zishobora kugaragara hifashishijwe camera zifata amashusho nijoro (night vision) cyangwa ibikoresho bifata ubushyuhe (thermal imaging sights).
Dmitry Rogozin, umusenateri w’Uburusiya wahoze ayobora NASA, yabwiye Forbes mu 2024 ko icy’ingenzi atari kumanura drones za Baba Yaga, ahubwo ari kumenya aho abaziyobora bihishe kugira ngo bafatwe cyangwa bicwe.
Intambara yo hagati aho irimo drones z’amoko atandukanye n’imbunda ziremereye irakomeje muri Kivu y’Amajyaruguru n’iy’Amajyepfo.
Alright, ggbbbetlogin is the real deal! Smooth interface and good odds. I’ve had some lucky spins here. Check it out for yourselves! ggbbbetlogin