Mozambique: Menya Impamvu Imfungwa zisaga 1500 zatorotse gereza

Polisi yo muri Mozambique yatangaje ko imfungwa zisaga 1,500 zatorotse gereza, zihishe inyuma y’imvururu za politike zikomeje kubera muri icyo gihugu, zishingiye ku byavuye mu matora byateje impaka.

Mu kiganiro n’abanyamakuru, umukuru wa Polisi Bernardino Rafael yavuze ko abantu 33 bishwe naho abandi 15 barakomereka mu bushyamirane n’abarinzi. Yongeyeho ko hari abagera ku 150 mu batorotse bamaze kongera gufatwa.

Imyigaragambyo yongeye kubura ku wa Mbere tariki 23 Ukuboza 2024, nyuma y’uko Urukiko rw’Ikirenga rwemeje intsinzi y’ishyaka FRELIMO, mu matora ya Perezida yabaye mu kwezi k’Ukwakira uyu mwaka wa 2024. Iryo shyaka rya FRELIMO rimaze imyaka 49 ku butegetsi.

Komanda Rafael yavuze ko ejo ku wa Gatatu tariki 25 Ukuboza 2024, amatsinda y’abigaragambya bamagana Leta begereye iyo gereza yo mu Murwa mukuru Maputo. Yavuze ko imfungwa zafatiranye izo mvururu, zisenya urukuta rwa gereza ziratoroka.

Mozambique yugarijwe n’imvururu n’imyigaragambyo kuva mu kwezi k’Ukwakira 2024, ubwo habaga amatora ya Perezida yakurikiwe n’impaka. Ibyavuye mu matora byatangajwe byagaragaje ko umukandida Daniel Chapo w’ishyaka FRELIMO ari we watsinze, ariko uwo bari bahanganye akavuga ko ari we wayatsinze, imyigaragambyo ihera ubwo.

Ibyavuye mu matora by’ibanze byatangajwe mu Kwakira byagaragaje ko Chapo yatsinze ku majwi 71%, naho uwo bari bahatanye ukomeye Venâncio Mondlane akabona amajwi 20%. Ariko urwo rukiko rwavuze ko Chapo yatsinze ku majwi 65%, naho Mondlane akabona amajwi 24%.

Ikinamakuru BBC cyatangaje ko kubera iyo myigaragambyo, ku munsi ubanziriza Noheli, umujyi wa Maputo washoboraga kugira ngo nta muntu uwubamo, kubera ko ubucuruzi hafi ya bwose bwari bwafunze, n’abantu bagumye mu ngo zabo mu kwirinda ko baza kwisanga muri izo mvururu za mbere mbi cyane zibaye muri uwo mujyi kuva FRELIMO yafata ubutegetsi mu 1975, ubwo iki gihugu cyo muri Afurika y’amajyepfo cyabonaga ubwigenge.

Ibiro by’ishyaka rya FRELIMO, stasiyo za polisi, za banki n’inganda byarasahuwe, birasenywa ndetse biratwikwa mu bice bitandukanye by’igihugu. Kuva ku wa mbere, abantu nibura 21 biciwe mu mvururu, nk’uko Minisitiri w’ubutegetsi bw’igihugu yabivuze ku mugoroba wo ku wa kabiri tariki 24 Ukuboza 2024.

Mondlane, wamaze guhunga akava muri Mozambique, amaze igihe asaba abamushyigikiye gukomeza kwigaragambya bamagana ibyavuye mu matora, avuga ko yabayemo uburiganya.

Mu butumwa yatangaje ku mbuga nkoranyambaga mu mpera z’icyumweru gishize, yavuze ko hashobora kubaho “imyivumbagatanyo mishya y’abaturage”, mu gihe ibyavuye mu matora byaba bitaburijwemo.

Muri rusange, abantu 150 ni bo bamaze kwicirwa muri iyo myigaragambyo imaze amezi atatu kuva amatora abaye.

Emmanuel McDammy